உலக சிலம்பம் ‘சாம்பியன்ஷிப்’ போட்டியில் தங்கத்தை தட்டிய அரசு பள்ளி மாணவர்கள்

கேரள மாநிலத்தில் நடந்த உலக சிலம்பம் சாம்பியன்ஷிப் போட்டியில் சுகுணாபுரம் அரசுப் பள்ளி மாணவர்கள் இருவர் தங்கம் வென்று பெருமை சேர்த்துள்ளனர்.

உலக சிலம்பம் சம்மேளனம் சார்பில் உலக சிலம்பம் சாம்பியன்ஷிப் போட்டி-2024, கேரள மாநிலம், திருவனந்தபுரத்தில் உள்ள, ஜிம்மி ஜார்ஜ் உள்விளையாட்டு அரங்கில் கடந்த, 4 முதல், 6ம் தேதி வரை நடந்தது. இதில், இந்தியா, வங்கதேசம், இலங்கை, சிங்கப்பூர் உட்பட, 9 நாடுகளில் இருந்து, 300க்கும் மேற்பட்ட வீரர், வீராங்கனைகள் பங்கேற்றனர்.

இப்போட்டியில்இந்திய அணி ஒட்டுமொத்த சாம்பியன் பட்டம் வென்றது. இதில் பங்கேற்ற, கோவை சுகுணாபுரம் அரசு உயர்நிலை பள்ளியில் எஸ்.எஸ்.எல்.சி., பயிலும் துரைஆனந்த், 60-65 கிலோ, ஜூனியர் பிரிவில்(ஸ்டிக் பைட்) தங்கம் வென்றுள்ளார்.

அதேபோல், எட்டாம் வகுப்பு பயிலும் மாணவி லியாஸ்ரீ, 40-44கிலோ, சப் ஜூனியர் பிரிவில்(ஸ்டிக் பைட்) தங்கம் வென்று பள்ளிக்கு பெருமை சேர்த்துள்ளனர்.

இருவரையும் பள்ளியின் தலைமையாசிரியர்(பொ) சாந்தி, உடற்கல்வி ஆசிரியர்கள் விஜயலட்சுமி மற்றும் சேகர் உள்ளிட்டோர் பாராட்டினர். சக மாணவர்களும் வாழ்த்து தெரிவித்தனர்.