Team KN
சிவகார்த்திகேயன் நடித்து தியேட்டர்களில் அனல் பறக்க ஓடிக்கொண்டிருக்கும் ‘அமரன்’ திரைப்படம் உலகம் முழுவதும் ரூ.200 கோடி வசூலித்துள்ளதாக தகவல் வெளியாகியுள்ளது.
இது, சிவகார்த்திகேயனின் கெரியரில் மகத்தான சாதனையாக அமைந்துள்ளது . ராஜ்குமார் பெரியசாமி இயக்கத்தில் சிவகார்த்திகேயன் நடித்து திரையரங்குகளில் வெளியான படம் ‘அமரன்’. இந்தப் படத்தில் சாய் பல்லவி கதாநாயகியாக நடித்து ரசிகர்களின் இதயங்களை கொள்ளை கொண்டார்.
அதே போல் ஜி.வி.பிரகாஷ்குமாரின் இசை படத்தின் வெற்றிக்கு வழிவகுத்து கொடுத்தது. கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் இந்தப் படத்தை தயாரித்தது.
இந்திய இரானுவ மேஜர் முகுந்த் வரதராஜனின் பயோபிக்காக இந்தப் படம் உருவாகியுள்ளது. படம் வெளியான முதல் நாளில் இருந்தே ரசிகர்களிடையே நல்ல வரவேற்பை பெற்றது மட்டுமல்லாமல் வசூலிலும் சக்க போடு போட்டு கொண்டிருக்கின்றது.
முதல் நாளில் ரூ.45 கோடிக்கும் அதிகமான வசூலை ஈட்டியதாக படக்குழு அறிவித்தது. அண்மையில் படக்குழு சார்பில் வெற்றி விழா நிகழ்வும் நடத்தப்பட்டது. இந்நிலையில், படம் வெளியாகி இன்றுடன் 10 நாட்கள் கடந்த நிலையில், இப்படம் உலகம் முழுவதும் ரூ.200 கோடி வசூலை ஈட்டியுள்ளதாக தகவல் வெளியாகியுள்ளது.
இந்தியாவில் மட்டும் ரூ.122 கோடியை வசூலித்துள்ளதாக கூறப்படுகிறது. இன்னும் தியேட்டர்களில் இப்படத்திற்கு கூட்டங்கள் அலைமோதுவதால் அமரன் படம் அசால்ட்டாக 250 வசூலிக்கும் என்று கருதப்படுகிறது.
