Robin
கோவை புளியகுளம் பகுதியைச் சேர்ந்தவர் மருதாசலம். இவர் சௌரிபாளையம்-புலியகுளம் சாலையில் தனது நண்பருடன் இன்று அக்டோபர்.12 நடந்து சென்று கொண்டிருந்தார். அப்போது அவ்வழியே அதிவேகமாக செப்டிக் டேங்க் லாரி ஒன்று வந்தது. அந்த லாரி சாலையோரம் நின்று கொண்டிருந்த கார் மீது மோதி, பின்னர் சாலையோரம் நடந்து வந்து கொண்டிருந்த மருதாசலம் மற்றும் அவர் நண்பர் மீதும் மோதியது.
இதில் கார் மீது தூக்கிவீசப்பட்டு, லாரி சக்கரத்தில் சிக்கிய மருதாசலம் சம்பவ இடத்திலேயே பரிதாபமாக உயிரிழந்தார். செப்டிக் டேங்க் லாரியை இயக்கிய பிரவீன் என்ற இளைஞரை காவல்துறையினர் கைது செய்தனர். விபத்து தொடர்பாக போக்குவரத்து காவல்துறையினர் வழக்குப்பதிவு விசாரணை மேற்கொண்டு வருகின்றனர்.
