கோவை பேரூர் தமிழ் கல்லூரியில் சாந்தலிங்க ராமசாமி அடிகளார் நூற்றாண்டு விழா மற்றும் நூல் வெளியீட்டு விழா (ஜனவரி 23) நடைபெற்றது.
இதில் சிறப்பு விருந்தினராக கலந்து கொண்ட பாஜக மாநில தலைவர் அண்ணாமலை, ப. ரகுராமன் எழுதிய "மறைந்திருக்கும் மர்மம்" எனும் நூலை வெளியிட்டு, தமிழ் கலாச்சாரம் மற்றும் மரபுகளின் முக்கியத்துவத்தை சிறப்பாக எடுத்துரைத்தார்.
அதனைத் தொடர்ந்து செய்தியாளர்களை சந்தித்த அவர், மத்திய அரசு மேலூர் பகுதியில் டங்ஸ்டன் திட்டத்தை முழுவதுமாக ரத்து செய்திருப்பதையும், அதன் மூலம் 20,000-க்கும் மேல் கிராம மக்கள் நிம்மதி அடைந்திருப்பதையும் விளக்கினார். "இந்த திட்டம் விவசாயிகளை பாதிக்கக் கூடாது என்பதற்காக, பிரதமர் மோடிக்கு நன்றி தெரிவித்துக் கொள்கிறேன்," என்றார்.
தமிழின் தொன்மையைப் பற்றி பேசிய அவர், "தமிழ் உலகின் தொன்மையான மொழி. 5300 ஆண்டுகளுக்கு மேலாக பேசப்பட்டு வந்த சான்றுகள் உள்ளன. புதிய ஆராய்ச்சிகள் தமிழின் வயதையும் பெரிதும் உயர்த்த வாய்ப்பு உள்ளது. இதை ஒவ்வொரு தமிழனும் பெருமையாக கொண்டாட வேண்டும்," என்றார்.
திருப்பரங்குன்றம் கோவில் சர்ச்சையைப் பற்றிய கேள்விக்கு பதிலளித்த அவர், "எனது விரதம் பிப்ரவரி 11, 12, 13 தேதிகளில் திருப்பரங்குன்றத்தில் முடிக்க உள்ளேன். திருப்பரங்குன்றம் என்பது புனிதமான இடம், திமுக மதச்சிக்கலை தூண்டிவிடும் வகையில் செயல்படுகிறது," என்று கூறினார்.
அவர்கள் பாஜக சார்பில் திருப்பரங்குன்றத்தை மையமாக கொண்டு பெரிய இயக்கத்தை நடத்த உள்ளதாக தெரிவித்த அவர், "இது போன்ற செயலில் ஈடுபடும் எவரையும் வன்மையாக கண்டிக்கிறோம். திமுகவைப் பொறுத்தவரை இது திட்டமிட்ட சதி," என்றார்.
