Team KN
இயக்குனர் நெல்சன் திலீப்குமார் இயக்கத்தில் சூப்பர்ஸ்டார் ரஜினிகாந்த் நடிப்பில் கடந்த ஆண்டு வெளியான ‘ஜெயிலர்’ திரைப்படம் தமிழ் சினிமாவில் மாபெரும் வெற்றி பெற்றது. ரசிகர்களிடம் பெரும் வரவேற்பைப் பெற்ற இப்படம், தமிழ் சினிமாவின் இண்டஸ்ட்ரி ஹிட் படமாகவும் கின்னஸ் சாதனையாகவும் மாறியது. இதுவரை இந்த வெற்றியை எதுவும் முறியடிக்கவில்லை என்பது குறிப்பிடத்தக்கது.
இந்நிலையில், ‘ஜெயிலர் 2‘ படத்தை உருவாக்க திட்டமிட்டுள்ளதாகவும், அதற்கான பேச்சுவார்த்தைகள் நடந்து வருவதாகவும் தகவல்கள் வெளியாகியுள்ளன. ரஜினிகாந்த், ‘கூலி‘ படத்தின் வேலைகளை முடித்தவுடன், ‘ஜெயிலர் 2’ படத்தில் நடிப்பார் என்று திரையுலக வட்டாரங்கள் தெரிவிக்கின்றன.
ஜெயிலர் 2-ல் தனுஷ் நடிக்கிறாரா?
சமீபத்தில், ‘ஜெயிலர் 2’ படத்தில் ரஜினிகாந்துடன் இணைந்து நடிகர் தனுஷ் நடிக்க உள்ளதாக இணையத்தில் ஒரு தகவல் வேகமாக பரவி வந்தது. இந்த செய்தி ரசிகர்களிடம் பெரும் எதிர்பார்ப்பை ஏற்படுத்தியிருந்தாலும், இது வெறும் வதந்தி என உறுதிப்படுத்தப்பட்டுள்ளது.
பத்திரிகையாளர்கள் அந்தணன் மற்றும் பிஸ்மி ஆகியோர், “ஜெயிலர் 2 படம் தற்போதைக்கு பேச்சுவார்த்தையில் மட்டுமே உள்ளது, அந்த படத்தில் தனுஷ் நடிப்பது தவறான தகவல்,” என்று தெரிவித்ததால், இச்செய்திக்கு முற்றுப்புள்ளி வைக்கப்பட்டுள்ளது.
‘ஜெயிலர்’ படத்தின் வெற்றிக்குப் பிறகு ‘ஜெயிலர் 2’ மீதான ஆர்வம் அதிகரித்துள்ள நிலையில், படக்குழு இதுகுறித்த அதிகாரப்பூர்வ அறிவிப்பை எப்போது வெளியிடுமோ என்ற காத்திருப்பு ரசிகர்களிடம் உள்ளது.
